Ísland hefur sett fram metnaðarfulla aðgerðaáætlun sem á að stuðla að samdrætti í losun gróðurhúsalofttegunda og leggja grunninn að kolefnishlutleysi landsins árið 2040. Á meðal aðgerða sem áætlað er að ráðast í næstu árin, er efling skógræktar, efling landgræðslu, og endurheimt votlendis.
Yggdrasill Carbon (YGG) er fyrirtæki sem stofnað var á Egilsstöðum árið 2020 og vinnur að loftslagsverkefnum í náttúru Íslands sem gefa vottaðar kolefniseiningar. Ein vottuð kolefniseining verður til þegar eitt tonn af koltvísýringsigildi, sem hefur verið mælt með viðurkenndum aðferðum og vottað sem slíkt, er dregið úr andrúmslofti eða er hindrað að berist í andrúmsloft. Aðaláhersla okkar hefur verið á kolefnisbindingu í skógi en meðfram þeim verkefnum vinnum við að þróun verkefna sem snúa að jarðvegi og endurheimt votlendis.
Öll verkefni YGG fara í gegnum vottun óháðs aðila. Vottun tryggir að kolefnisbinding sem verður til í slíkum verkefnum, hafi átt sér stað í því magni sem gefið er út til kolefnisjöfnunar og gerir ferlið gegnsætt og vandað. Vottun krefst einnig víðtæks samráðs, hún hvetur til gagnrýnnar hugsunar, dregur fram áherslu á gæði umfram magn og tryggir að ekki sé hægt að stíga skrefin áfram nema með sjálfbærni að leiðarljósi.
Vottunarstaðlar gera kröfu á að verkefni hafi jákvæð áhrif á fleiri þætti en loftslagið. Jákvæð hliðaráhrif okkar verkefna eru fjölbreytt og snúa meðal annars að auknum atvinnumöguleikum í sveitum og aukinni verðmætasköpun sem hefur áhrif á samfélagið í víðara samhengi. Jákvæð áhrif snúa líka að uppgræðslu lands, aukinni líffjölbreytni á rofnu landi og næringarríkari jarðvegi.
.jpg)
.png)
